بحث هذه المدونة الإلكترونية

السبت، 8 ديسمبر، 2012

5 أخطاء تجنبها عند الاعلان عن منتجك / خدمتك




 بتفكر تعلن عن منتجك وخدمتك، بتجهز صيغة توصل بيها لكل العملاء، فيه 5 أخطاء حاول تتجنبها وانت بتسوق لفكرتك:

* العملاء مهتمين بمشروعى وبخبراتى

دى أول غلطة، العملاء غير مهتمين بميزانية مشروعك، ولا انت شغال فى السوق من سنة كام، اللى يهم العملاء ان المنتج أو الخدمة اللى بتعلن عنهم تقدم لهم فايدة، يحسوا انهم محتاجينها وانها هتفرق معاهم وهتخلي حياتهم أسهل.

العميل عشان يطلع محفظتة ويصرف الفلوس اللى هو تعبان فيها ويفكر يشترى أى منتج، لازم يحس انه هيفرق معاه.. ركز ان دى تكون رسالتك للعميل وطريقتك فى التسويق، المنتج وفوائده، مش مميزاته ومميزاتك.


* ممكن أستخدم نفس الاسلوب فى الاعلان عن المنتج فى أى مكان

أكيد لا.. لو قررت تعمل أعلان فى الطريق مثلا لازم تكون رسالتك مختصرة، واضحة ومباشرة، أما لو العميل أختار ان يوصله منك ايميلات تتكلم عن منتجك، رسالتك هنا هتكون واضحة أكتر، فيها تفاصيل وبتتكلم باستفاضة عن منتجك.

لازم تاخد بالك من ظروف المكان اللى بيتواجد فيه العميل وهو بيقرا رسالتك، وعندك كام دقيقة تقدر توصل فيها رسالتك.


* ممكن أستخدم نفس الاسلوب فى الاعلان عن المنتج مع كل الناس

الناس كلها مش بتفكر بنفس الاسلوب، ولا عندها نفس الخلفيات عشان أقدر برسالة واحدة أوصل للكل.

طريقتك فى اعلانك وكلامك عن منتجك لعميل دخل موقعك وأختار انك تبعتله وتكلمه أكتر عن المنتج، مش ممكن تكون هى نفس الطريقة اللى تعلن بيها فى الجرايد لعملاء ممكن يكونوا أول مرة يسمعوا عن منتج.


* لازم طريقتى فى الاعلان توضح انى خبير فى مجالى

مش دايما، يعنى لو الشريحة المستهدفة من رسالتك الشباب فى سن معين، مش محتاجين يسمعوا مصطلحات ولا يعرفوا أد ايه المشروع عبقرى، محتاجين رسالة اعلانية تشدهم وتجذب انتباهم.

أما لو هتستهدف ناس متخصصة فاهمين فى مجال مشروعك، مهندسين مثلا أو أطباء تقدر تستخدم كل المصطلحات اللى شايفها مناسبة.


* مفيش اسهل من انى أكتب صيغة لاعلان

الموضوع مش سهل، لازم تاخد فى الاعتبار كل النقاط السابقة، بالاضافة لاعتبارات تانية كتير، محتاج حد عنده خبره، فاهم وعارف يوصل الرسالة للمستهلكين أزاى وبأسهل وأقصر الطرق.

أنت محتاج حد يقدم السهل الممتنع، وطالما ده بعيد عن تخصصك ابحث عن خبير فى مجال الكتابة Copywriter، وجود الشخص داه ضمن فريق عملك هيفرق كتير فى نجاحك للتسويق لمنتجك أو خدمتك. (نقلا عن مدونة IMIDOS)

ليست هناك تعليقات:

إرسال تعليق