بحث هذه المدونة الإلكترونية

الأحد، 11 نوفمبر 2012

أزاي تعرف ان شخصيتك مناسبة للعمل الحر؟


مش كل الناس تقدر تشتغل من البيت .. يا ترى عندك الشخصية المناسبة اللى تقدر تستحمل النوع ده من الشغل؟

محتاج قبل ما تبدأ شغل من البيت تفكر كويس جدا ليه عايز تعمل كده، لان الشغل والبيت مستحيل ينفصلوا عن بعض بشكل كامل بالعكس الأمر بيتفاقم أكتر للي بيشتغلوا من البيت وده بيؤدي لمشكلتين أساسيتين.

* التحفيز الذاتي: لو بتصحى كل يوم الصبح تنزل تروح الشغل مهما كانت الظروف برد ، حر ، مطر .. مضطر تروح لان الوظيفة بتلزمك بكده، إنما تخيل لو قاعد في البيت ماحدش بيطلب منك حاجة والدنيا برد .. طبعا هتكمل نوم، عشان كدة الشغل من البيت محتاج تحفيز ذاتي.. ماحدش هيجبرك تعمل حاجة انت اللى لازم تجبر نفسك بنفسك وتبقى رقيب عليها والمدير بتاعها كمان.

* الوحدة والعزلة: بعد ما قضيت كام سنة في الكلية واتعودت على الخروج كتير القعاد في البيت بيكون قاسي ومحبط، نفس المكان ونفس الأربع حيطان بتوع كل يوم هما هما، علاج المشكلة دي بيعتمد على نقطة التحفيز الذاتي.

بس قبل ما أقولك العلاج لازم تسأل نفسك سؤال: عايز أرجع شكل حياتي قبل ما اشتغل من البيت؟ لو الإجابة بأيوه ومهم جدا بالنسبالك تتكلم مع زمايلك طول اليوم فبديهي انك مش الشخص المناسب للشغل من البيت وساعتها حاول تبحث عن شغل برا البيت، لكن لو لأ وفعلا عايز تكمل لازم تحاول تقاوم إحساسك بالوحدة والعزلة .. إزاي؟

* اتصل إطمن على أقاربك من وقت للتاني وإرجع كلم صحاب زمان اللى بطلت تكلمهم من أيام الكلية او حتى المدرسة..الطريقة دي هتفصلك شوية عن جو الشغل وهتعمل نوع من التواصل الإجتماعي انت محتاجه.

* لو تعرف حد بيشتغل زيك من البيت وبيحب الطريقة دي في الشغل حاول تكلمه وتعرف منه ايه أحسن طريقة تخليك تشتغل من البيت وانت مبسوط

* خليك دايما مشغول! المشاكل مش بتبان قوية أوي ومش بنركز فيها طول ما أحنا مشغولين وورانا حاجات كتير أوي عايزين نعملها.

* بعد يوم الشغل اقفل الكمبيوتر خالص وأخرج مكان بتحبه او قابل اقاربك وأصدقائك وجها لوجه، هتفرق معاك كتير. (هذا الموضوع وما سيليه عن ريادة الأعمال نقلا عن صفحة IMIDOS على الفيس بوك)


أقرأ أيضاً:
4 نصائح لحل مشاكل العمل من البيت

ليست هناك تعليقات:

إرسال تعليق