بحث هذه المدونة الإلكترونية

الثلاثاء، 16 أكتوبر، 2012

عايز تبدأ مشروع جديد؟.. فكر بره الصندوق


لسة مالاقتش فكرة جيدة لمشروعك؟ ..هنقدملك دلوقتي طرق تساعدك تلاقي الفكرة اللى بتدور عليها

الفكرة المبتكرة بيكون فيها جزء مجنون،  حاجة غير منتشرة ومش مألوفة ومختلفة فتلفت أنظار الجميع والمشروع ينجح .. هنقترح عليك بعض الأفكار:

* بتعرف تعمل ايه؟ الإجابة على السؤال ده ممكن تعمل مشروع ناجح لو قررت تحول هوايتك أو الحاجة اللى انت بتعرف تعملها لمشروع ربحي ، مثلا لو بتحب القراءة وبتعرف تختار كتب كويسة للقراءة ممكن في الحالة دي تعمل موقع ترشح من خلاله كتب للناس تقرأها 

* صمم Design: معظم الشركات دلوقتي بتتجه أكتر للتصميم وده طبيعي لإن التكنولوجيا هي سمة عصرنا وعلاقة الإنسان بالكمبيوتر بقت قوية جدا وده بيخلي كل المجالات بتتعامل مع الكمبيوتر بشكل أو بآخر .. في الحالة دي لما تشتغل او تخلي مشروعك في التصميمات فرصتك في النجاح هتزيد .. خصوصا لو تصميماتك مبتكرة ومختلفة.

* مفتاح الحصول على فكرة جديدة هو دمج حاجتين مالهومش علاقة ببعض لان التضاد في الحالة دي بيخلي الفكرة غريبة وجديدة ومرحب بيها

* عشان تلاقي فكرة مختلفة محتاج تشوف كل شئ حواليك بدقة شديدة ، ويبقى عندك بعد نظر عشان تفكر في فتح أسواق جديدة ماحدش فكر فيها قبلك

ولو جربت كل الطرق دي ومانفعتش برضه ممكن تسافر أجازة لبلد أول مرة تزورها عشان ينشط عقلك ويحفزه يطلع أفكار جديدة.



استنى.. هتعمل ايه لو معرفتش تسافر بلد تانية علشان تقدر تطلع أفكار جديدة؟!، خد في اعتبارك شوية حاجات:
المشاريع العظمية مش بتقدم خدمة هامشية او ميزة إضافية لأي سلعة ، بالعكس بتحاول تقدم حلول واقعية لمشاكل عميقة مهمة ومؤثرة.

علشان تلاقي فكرة لمشروعك:
* ابحث عن سوق كبير: حاول تبحث عن سوق لخدمة أو سلعة مش عليها إقبال كبير من باقي الشركات وبالتالي مش هتلاقي منافسين كتير

* ابحث عن مشكلة: إدرس السوق اللى اختارته كويس وشوف ايه المشكلة الواضحة فيه، بعد ما توصل للمشكلة حاول تفهمها أكتر وإتكلم مع خبراء في المجال ده والعملاء اللى هيستفادوا من الخدمة دي واللي عاملين مشاريع مشابهة، وممكن كمان تشتغل في المجال ده كام سنة قبل ما تبدأ مشروعك.

* فكر في حلول سريعة ومبتكرة للمشكلة: في الغالب أول تجارب لحل المشكلة على الورق مش هتنجح ومع ذلك أول ما تبدأ مشروعك وتحاول تنفيذ الحل على أرض الواقع هتتعلم بسرعة ايه اللى ينفع وايه اللي ماينفعش.

وقبل ما نسيبك دي 6 نصائح مبتكرة علشان فكرتك تنجح

* إعرف الـFeedback لمشروعك قبل ما تبدأ: أسرتك وأصحابك قريبين منك وبيحبوك عشان كدة صعب يدوك رأي محايد وموضوعي عن مشروعك ، ضروري تستشير حد تثق في رأيه ومعلوماته عن مجال مشروعك ويقولك نقد موضوعي وبناء لأفكارك وتعرف المنتج أو الخدمة اللى ناوي تقدمها هتحقق نجاح ولا لأ ، الخطوة دي ممكن تستصعبها وتكسل تاخدها بس لو نفذتها هتوفر عليك مصاريف ووقت ومشاكل في المستقبل.

* إدرس جغرافية مشروعك: لو محتاج تجمع دخل من المحيط اللى حواليك هتحتاج تحسب المكان اللى مشروعك بيخدمه فيه عملاء كفاية محتاجين السلعة او الخدمة اللى هتقدمها ولا لأ ، مهم تدرس الموضوع ده عشان تضمن مستوى معين من المبيعات ماتقلش عنه والمشروع ينجح.

* خد خطوات صغيرة: في الغالب أفضل شئ ممكن تعمله في بداية مشروعك هو البداية على مستوى صغير لانك بالطريقة دي هتقدر تختبر أفكارك ومنتجاتك وإنتشارها بدون ماتتحمل مصاريف ومخاطرة كبيرة.

* حقق شهرة في أقرب وقت ممكن: وانت بتبدأ مشروعك إعرض خدمة او سلعة معينة مجانا .. الطريقة دي هتعملك سمعة طيبة وشهرة بين العملاء اللى محتاجين السلعة اللى بتقدمها ، وهتديهم كمان فرصة يجربوا منتجاتك ويثقوا فيها.

* ما تصرفش كتير على التسويق: إنشئ مدونة عن مشروعك تصميمها حلو فيها صور جذابة وأقوال مأثورة ليها علاقة بمشروعك ولو أمكن فيديو بيشرح فكرة المشروع ، ممكن كمان تطبع كروت تنشرها بين معارفك وتعمل صفحة على الفيسبوك وتويتر لو تحب وقضي شوية وقت ومجهود عشان تزود عدد متابعينك .. كل الوسائل دي ممكن تحققها بميزانية بسيطة كبداية ومن خلالها تقدر تسوق أكتر.

* إحكي قصتك كويس: ممكن تحقق مبيعات عالية وتلفت إنتباه العملاء أكتر لو حكيت قصتك، وساعتها مهمة بيع سلعتك وتسويقها هتبقى سهلة جدا ، ماتتكسفش وإحكي عن نفسك بقوة ووضوح الناس هتقرا وتشوف وتسمع كل اللى بتقوله لانك كشخص مبدع حكايتك وأفكارك هتهم وتلهم ناس كتير ، وبكدة تبقى استخدمت إبداعك في جني أرباح كتير.

هذا الموضوع وما سيليه عن ريادة الأعمال نقلا عن صفحة IMIDOS على الفيس بوك.. هنا

ليست هناك تعليقات:

إرسال تعليق