بحث هذه المدونة الإلكترونية

الثلاثاء، 30 أكتوبر، 2012

فكرت تعمل مدونة لمشروعك؟


فكرت تعمل مدونة لمشروعك ؟ .. إفرض لو عملت مدونة وماحدش دخل زارها خالص هتفضل فاتحها ولا هتقفلها؟ .. ناس كتير ممكن تقول آه طبعا أقفلها، لكن تتفاجئ إن إجابة أصحاب الأعمال المشاهير على مستوى العالم هتكون لا مستحيل أقفل المدونة ؟!.. طب ليه؟ علشان في 5 أسباب تخليك لازم شركتك أو مشروعك يكون ليهم مدونة

* قوة الفريق: وجود مدونة والسماح لكل اللى بيشتغلوا معاك في مشروعك بالكتابة فيها هيخلق جو من الإنتماء بين الفريق ولما الإنتماء يزيد هيحبوا المشروع أكتر وينتجوا ويحسنوا من أداء المدونة أكتر وبالطريقة دي الكل هينجح ويستفيد

* التدوين هيطورك: لما تعمل مدونة لشركتك هتضطر تتابع كل جديد له علاقة بمجالك عشان تكتب عنه، كمان هتتعلم ازاي توصل المعلومة ببساطة ووضوح عشان القارئ يفهمها وده مع الوقت هيطور عندك مهارات التواصل بينك وبين العميل ، ومن ناحية تانية هتتعود يبقى عندك إجابة لكل سؤال ممكن العميل يطرحه عليك

* عامل ثقة: التدوين بيخلي زيادة المبيعات عملة غير معقدة زي ما بتتخيل لأن: 
محتوى مفيد = ثقة
ثقة = تواصل
تواصل = مبيعات

فكل ما كان محتوى المدونة مفيد للعميل ومالوش أي هدف غير الإجابة على اسئلته ومساعدته على الفهم، كل ما عامل الثقة زاد بين شركتك وبين العميل وزيادة الثقة في الشركة هتؤدي بالتبعية لزيادة الثقة في السلعة او الخدمة اللى بتقدمها وبالتالي زيادة المبيعات.

* التدوين يعني عميل أفضل: العملاء نوعين  نوع بيبحث عن السعر الأقل ونوع تاني بيدور على منتج جودته عالية بسعر معقول، ولو سألت أي قسم مبيعات وتسويق في أي شركة بيفضل أنهي نوع هيقولك النوع التاني طبعا.

التدوين هيوصلك بكل سهولة للعميل المناسب اللى بيدور على القيمة والجودة؛ لأن اللي هيقرأ في مدونة الشركة يبقى عميل قارئ مهتم يبحث ورا المعلومة ويفهم أكتر ولما يقرأ تدوينات كتير في مدونة الشركة هيبقى عنده معلومات كتيرة عن الشركة والمنتج والمجال كله بشكل عام.

* قوة التعليقات: التعليقات هتسمحلك تشوف العالم بعيون العميل وتتعلم منه وتعرف رأيه في السلعة بتاعتك وتعليقاته السلبية والإيجابية عن شركتك وده أكيد هيساعدك تطور من نفسك أكتر، وكمان هتستفيد من الأسئلة الكتير لأنها هتخليك تكتب بوست جديد على المدونة تجاوب فيه وتشرح بالتفصيل أكتر، ومن ناحية تانية زيادة التواصل في التعليقات هتنشأ مجتمع مصغر من العملاء اللى معجبين بمشروعك وهدفه.

هذا الموضوع وما سيليه عن ريادة الأعمال نقلا عن صفحة IMIDOS على الفيس بوك.. هنا

هناك تعليق واحد: