بحث هذه المدونة الإلكترونية

الخميس، 18 أكتوبر 2012

7 نصائح ستساعدك في إدارة مشروعك


وأنت بتبدأ مشروعك ممكن تحس انك فى متاهة.. مش عارف تبدأ منين ولا أنت وصلت هنا أزاى.. دلوقتي هنقدملك 7 نصائح تساعدك فى إدارة مشروعك.

* خطة مكتوبة
من غير خطة مكتوبة وواضحة هيكون مشروعك عبارة عن متاهة مش عارف توصل لاى حاجة.

خطتك المكتوبة مش بالصعوبة اللى أنت متخيلها، مش هتألف كتاب، مجرد كام صفحة تتكلم فيهم عن هدفك،استراتيجيتك،الحسابات ،خطة المبيعات والتسويق ومحتاج تمويل اد ايه علشان تقدر تخلص التزاماتك.

* خطتك مش زوجة العمر
ما تتعاملش مع الخطة أنها شىء ثابت مش ممكن يتغير، لازم تتكيف مع الظروف المتغيرة كل يوم.. وأى مشكلة تقابلك أرجع للخطة وشوف هى مناسبة لحل المشكلة ولا محتاجة تعديل.

* أسمع
أكيد حواليك ناس كتير خايفين على مصلحتك وعاوزينك تكون الافضل..أسمع لنصايحهم ونقدهم.

أسمع نقد العملاء والشركاء حتى المنافسين بصدر رحب..النقد مش موجه لشخصك، انما لافكار خاصة بمشروعك، فبلاش تاخد أى نقد بشكل شخصي، وأفتكر كلام بيل جيتس"عملائك الاكثر غضبا هم أعظ مصدر تعليم لك".

* راقب.. سجل
راقب كل نشاط من أنشطة مشروعك، وسجل كل مصادر ارباحك بالارقام.. كل يوم تابع وراقب الارقام وأزاى بتتطور، وعلى أساس الارقام خد قراراتك.

* اهتم بالنتيجة أكتر من الطريقة
مهمة المدير هى توزيع المهام ومتابعة كل موظف، بلاش يكون هدفك أنك صاحب القرار فى كل التفاصيل وعاوز تتحكم فى كيفية أداء الوظيفة أكتر من اهتمامك بالنتيجة، أدى لكل موظف مساحتة وأكتب مهام كل واحد بالتفصيل..وتابع النتايج، أعمل نظام حوافز..وكافأ الافضل كل شهر.

* استخدم الانترنت
أبنى كيان لمشروعك على الانترنت من خلال مواقع التواصل الاجتماعى زى تويتر والفيس بوك، وطلع تقارير كل شهر تتابع منها رضاء العملاء وتفاعلهم معاك
الموضوع محتاج وقت ومجهود، لكن لازم تبدأ؛ لان كل منافسيك بدأوا فعلاً.

* أكتشف مشروعك من جديد
من فوائد شبكات التواصل الاجتماعى أنك كل يوم هتشوف وتعرف حاجة جديدة، بلاش تغمض عنيك..جدد فى أنشطة مشروعك وتابع ردود فعل العملاء، وهتلاقى نفسك كل فترة عندك جديد، وكأنك بتعيد أكتشاف مشروعك.

وأخيراً: أنت اخترت تكون صاحب مشروع، وبدأت تاخد الخطوات الاولى فاستمتع بكل لحظة بتقرب فيها خطوة من تحقيق حلمك.

هذا الموضوع وما سيليه عن ريادة الأعمال نقلا عن صفحة IMIDOS على الفيس بوك.. هنا

ليست هناك تعليقات:

إرسال تعليق