بحث هذه المدونة الإلكترونية

الجمعة، 19 أكتوبر، 2012

اسوأ 10 شركاء لمشروعك


الشراكة ممكن تكون نعمة وتأثر بشكل إيجابى على مشروعك..وفى أوقات تانية ممكن تكون نقمة وتخسر كتير بسببها.

طيب عملت اللى عليك؟ فكرت كويس وحسبتها صح؟ قدرت تختار شخص تأتمنه على حلمك وفلوسك؟.. دى قائمة بأسوء 10 شركاء لمشروعك

* السيد موظف
السيد موظف هو الشخص اللى مفيش عنده أى إستعداد يدي مشروعك أكتر من ساعات العمل الرسمية.. يشتغل من الساعة 7 الصبح للساعة 2 الضهر مثلا، ويروح يتغدا ويتفرج على التلفزيون، ويقضى حياته أنه موظف غير مسئول عن نجاح مشروع.. كمان مش هيقدر يتحرك أى خطوة غير وأنت محدد يتحرك أزاى، وفى وقت ما مشروعك يواجه أى صعوبات مالية هيطلب منك فض الشراكة لان عنده أولويات ومش هينفع يستنى.

الحل: إختار شخص مستعد يديك من وقته ومجهودة زى ما أنت مستعد تدي مشروعك.

* السيد كمال
الشخص اللى مش هياخد أى خطوة الا لما يتأكد للمرة الـ 50 إن مفيش شىء ناقص.. يعنى قبل ما يحط الخطة هيعمل بحث عن كل حاجة تخص مجال مشروعك. ده ممكن ياخد منه شهر علشان يتأكد انه عرف كل حاجة.. بعدين يبدأ يكتب الخطة اللى هتتكون من 150 صفحة على الاقل..وده هياخد منه شهر كمان..طيب نبدأ بقى!

لا لسه السيد كمال محتاج يتأكد ان خطتة كاملة وسليمة..هيعمل إستبيان ويبعته لاصدقائه ومعارفة وأهله وكل الناس اللى يعرفهم علشان يتأكد ان كل حاجة صح..وطبعا مش ممكن تبدأ الا لما يتأكد ان كل شىء كامل.

الحل: الخطة لو جيدة بس تتنفذ النهاردة، أفضل من خطة ممتازة وتتنفذ بعد شهور.. إختار شخص متحمس مش خايف من الاخطاء وعارف إنها لازم تحصل، أختار شخص ينفذ مش بس يخطط.

* السيد كوووول
الشخص اللى دايما بيتكلم كتير ويتباهى طول الوقت بأى فكرة قالها فى يوم من الايام حتى لو غيرة هو اللى نفذها.. طول الوقت هيحسسك انه فاهم أكتر ويقدر يعمل كل حاجة أفضل منك.

السيد كوووول مش هيكون فاضى طول الوقت للشغل..عنده خروجات وسفريات وفسح.. ممكن يتابع معاك بالتليفون لو أمكن ووقت توزيع الارباح او وقت دفع مرتبة.. هيكون موجود وقاعد ومستنى وهتبقى مشكلة كبيرة لو أتأخرت عليه.

الحل: مش معنى وجود ميزة معينة فى شخص إنك تتغاضى عن باقى عيوبه..إختار شخص عاوز يكون موجود معاك خطوة بخطوة.

* السيد إختراعات
الشخص اللى بيطرح كل فكرة على إنها فكرة بمليون جنيه ويبدأ العمل عليها.. وبعدين فى النص يحس إنها محتاجة تطوير.. وبمجرد ما تخرج للنور يقول لا محتاج تطوير أكتر أو يفكر فى حاجة تانية خالص ويبدأ فيها من جديد.

السيد إختراعات هو اللى بيبنى أحكامه على اساس انهم ناس لطيفة..أو هو حاسس انهم كويسين.

الحل: الشخص الناجح جدا أكاديمياً مش لازم أبدا يكون رجل أعمال ناجح..إختار شخص يقدر يساعدك فى التعاقدات ورسم الخطط ويساعدك إنك تمشى على أساس خطة بشكل ناجح

* السيد دايما على حق
العبارة اللى على طول هتسمعها على لسان الشخصية دى "أنا عمرى ما بغلط" أو "أنا دايما على حق" هيكون الشغل معاه بالشكل التالى 'my way or the highway' عادة مش هيرجعلك فى أى قرار، لانه دايما صح وعلى حق هيكون سعيد جدا وهو بيسفه من أراء أى شخص بيحاول يتناقش معاه أو يعارضة فى أى قرار وأول ما خطته تفشل هيرمى اللوم على كل الناس الا نفسه.

الحل: التواصل بين الشركاء من أسباب نجاح أى مشروع.. إختار شريك مش ديكتاتور.. مفيش حد دايما على حق.

* السيد أحلام وردية
هتلاقية دايما بيكرر عبارة "بكرة وأحنا مليونيرات هنعمل كذا وكذا" وممكن يحكى هو أزاى هيصرف فلوسة لما يبقى مليونير.. لكن مشكلة السيد أحلام انه معندوش خطة مش بس علشان يبقى مليونير..لا ده خطة الشهر الجاى هتلاقيها مش جاهزة.

الحل: مفيش نجاح من غير تعب.. طبعا لازم تكون متفائل وواثق فى نفسك وفى نجاحك أنت ، لكن لازم تكون عارف هتعمل ده أزاى.. إختار شخص واقعى عارف هو هيوصل للنجاح أزاى.

* السيد تبذير
قبل ما تخطط لاى حاجة فى شركتك هيكون أهم أولوياتك هو التخطيط لمكتبه اللى مش هيرضى لازم يكون مكتب فخم وغالى من أساسيات نفقات الشركة كل شهر، نفقات سفر وتنقل السيد تبذير اللى مش هيوافق بأى حاجة.. كمان علشان يقابل أى حد من العملاء خارج الشركة لازم يكون فى مكان من أغلى الاماكن فى البلد غير طبعا مرتبة الا ما ينفعش تتناقش فيه.

الحل: مفيش حاجة أسمها علشان شريك يبقى يصرف زى ما يحب..إختار شخص شايف ان مشروعك يستحق أستثمار كل جنية ..مش يستثمر فى أسلوب حياته الخاصة وبس.

* السيد رئيس مجلس الادارة
ده الشخص اللى فى أول 10 ثوانى من تعرفك به يبدأ يطلع الكارت الشخصى ويقول أنا رئيس مجلس الادارة بغض النظر عن أن قيمة شركته فى السوق ممكن تكون أقل من قيمة الكارت الشخصى اللى بيقدمه.. عاوزاك دايما تديله برستيجه..ويبقى فى الصورة وهو صاحب الشركة..ده أكتر شىء يهمه..أما الشركة شغالة أزاى..لا هو رئيس مجلس الادارة مالوش دعوة.

الحل: الشركات والمشاريع الناجحة لا تبنى على أسماء..إختار شخص يهمه المشروع..ما يكونش أنانى وكل اللى يهمة انه المدير وبس.

* السيد أجازات

الحل: لازم تكون واضح فى توزيع مهام العمل وتكون متضمنة الاجازات.

* السيد أعذار
الشخص اللى لازم يتأخر أو ما يحضرش اصلا وأول ما تشوفة يقابلك بقصتة الدرامية.. وهو ماشى وقع فى حفرة نزل وراة كلب عضة، وبعدين بلطجية طلعوا عليه فى الحفرة وفى الاخر زحف لحد المستشفى وأخد علاج لمدة 6 سنين، ودلوقتى لما أنت قابلته بالصدفة حصلت معجزة وبقى كويس وطلع من المستشفى .. الشخص ده مش هيكون موجود فى أهم الاجتماعات، مش هيكون موجود فى الصفقات اللى وجودة ضرورى فيها ولما يظهر هيحكى قصة كالعادة..وعادة هيطلب فلوس من حساب الشركة علشان يقدر يحل مشاكله.

الحل: أنت بتشتغل يعنى ظروف غيرك المتكررة واللى بتأثر على سير العمل لا تخصك، وكل شخص مسئول عن التوفيق بين حياتة وشغلة.. دى مش مسئووليتك

هذا الموضوع وما سيليه عن ريادة الأعمال نقلا عن صفحة IMIDOS على الفيس بوك.. هنا

ليست هناك تعليقات:

إرسال تعليق